"Palçıq pilpiləsi” yatağı Çilov adasının qurtaracağından “Neft Daşları”na qədər böyük bir ərazini əhatə edir. Bu yatağı "Neft Daşları”nın "kiçik qardaşı” da adlandırırlar və hər iki yataq SOCAR-ın “Azneft” İB-in Neft Daşları NQÇİ tərəfindən işlənilir. “Palçıq pilpiləsi” Bakı şəhərindən 80 km şərqdə, Abşeron yarımadasının şimal-şərqində yerləşir. Yatağın bu cür adlandırılması dənizin həmin ərazilərində palçıq vulkanlarının olması ilə əlaqədardır. Burada suyun dərinliyi 10-25 metr arasında dəyişir, bəzi hissələrdə bir qədər də dərin olur. Məhsuldar qatın QaLD tavanına görə qırışığın uzunluğu 10 km, eni isə 2,5 km təşkil edir.
1954-cü ildə ƏODÜ (Əks olunan dalğa üsulu - MOV) metodu ilə birlikdə aparılan SDKÜ (sınan dalğaların koreliyasiyası üsulu - KMPV) metodu nəticəsində “Palçıq Pilpiləsi” ayrıca bir struktur kimi ayrılıb. Dərin axtarış qazmasına 1952-ci ildə başlanılıb. Strukturun CQ qanadının yuxarısında 22 saylı ilk axtarış quyusu layihə dərinliyinə çatdırılmayıb. Sonralar yataqda 20, 79, 261 və 265 saylı quyular qazılıb. 1953-cü ildə 20 nömrəli axtarış-kəşfiyyat quyusundan QaLD qaz-neft, QA-dan isə neft, 79, 261 və 265 saylı kəşfiyyat quyularından isə QaLD-dən 30-40 t/gün hasilatla neft alınıb. Yataqda qazılan kəşfiyyat quyuları arasındakı məsafə 400 m götürülüb və bu quyulardan neft-qaz alınması yatağın böyük perspektivliyini göstərib. Sonrakı axtarış-kəşfiyyat işləri nəticəsində strukturun cənub-qərb qanadı və tağ hissəsi hüdudunda sənaye əhəmiyyətli neftlilik-qazlılıq müəyyən edilib. Yataq 1963-cü ildən sənaye əhəmiyyətli işlənməyə daxil olunub.
2020-2022-ci illərdə “Həzi Aslanov-Palçıq Pilpiləsi-Neft Daşları” sahələrini əhatə edən 3D seysmik kəşfiyyat işləri aparılıb.
01 yanvar 2024-cü il tarixinə olan məlumata görə, yataqda ümumilikdə 348 quyu qazılıb, hazırda 112 quyu istismardadır, işlənmənin əvvəlindən yataqdan 10.459 milyon ton neft, 5.4180 min m³ su, 776 milyon m³ qaz hasil edilib. Yataqda maksimal neft hasilatı 1969-cu ildə 354 min ton həcmində olub. “Palçıq pilpiləsi” yatağında lay təzyiqini saxlamaq üçün 1964-cü ildən suyun vurulmasına başlanıb. Qeyd olunan tarixə ümumilikdə, laylara 12,754 milyon m³ su vurulub və əlavə 2,22 milyon tondan çox neft əldə olunub.
Yataqda istehsalat prosesləri estakada və dərin özüllərdən aparılır. Yatağın perspektivliyini nəzərə alaraq “Palçıq pilpiləsi” yatağının işlənməsini davam etdirmək məqsədilə 3 yeni özüllərin tikintisi və yeni quyuların qazılması planlaşdırılır.