“Tərsdəllər” yatağı Kür və Qabırrı (İori) çayları arasında, inzibati cəhətdən Şəmkir rayonu ərazisində, “Ceyrançöl” sinklinoriumda yerləşir. Regional tektonikası və stratiqrafik elementlərinə görə “Tərsdəllər” qırışığı Kür və Qabırrı çaylararası neftli-qazlı rayonuna daxildir.
Yatağın quruluşu və tektonikası haqqında məlumatlar başlıca olaraq seysmik-kəşfiyyat işləri, eyni zamanda qazılan dərin quyular vasitəsilə əldə olunub. Qafqaz regionunda ən iri struktur elementlərdən biri olan Kür çökəkliyinin tektonik xüsusiyyətləri barədə ilk məlumatlar XX əsrin 30-cu illərində P.Renqarten, D.Arxangelsk, M.Qubkin tərəfindən verilib. Bu çökəkliyin dərinlik geoloji quruluşunu, struktur-tektonik xüsusiyyətlərini daha dəqiq öyrənmək məqsədilə 1927-ci ildən başlayaraq burada geofiziki tədqiqatlar aparılıb və 1949-cu ildə Kür-Qabırrı çayları arasında lokal anomaliyalar aşkarlanıb. 1991 və 2010-cu ildə ərazidə seysmik kəşfiyyat işləri aparılıb. Əldə olunmuş materiallar əsasında ərazidə çökmə süxurların daha böyük qalınlığa malik olduğu təsdiqlənib və daha dərin qatların neft-qazlılıq baxımından öyrənilməsi zərurəti ortaya çıxıb. “Tərsdəllər” qalxımı iki meridianla yaxın istiqamətli tektonik qırılma ilə üç əsas bloka ayrılıb. Sahənin şərqindən keçən qırılma regional qırılmadır. Qalxım cənub-şərq istiqamətli çıxıntı şəklindədir. Qalxımın şimal periklinalı daha davamiyyətlidir. Qalxımın neftli bloku olan mərkəzi blokun 3300 m izohipsi bazis olmaqla, tektonik ekranlaşmış tələnin ölçüləri 5.5×1.5 km-dir.
“Tərsdəllər” yatağında 1 nömrəli axtarış quyusu 1983-cü ilin sentyabr ayında sutkalıq 250-300 ton neft hasilatı ilə istismara verilib. Hasil olunan neftin tərkibində qətran 10,67%, parafin 0,8%, kükürd isə 0,147%-dir. Neft az kükürdlü hesab olunur. Yataqda 01 yanvar 2024-cü il tarixinədək 27 quyu qazılıb, 149.9 min ton neft çıxarılıb.
Yataq SOCAR-ın “Azneft” İB-in Ə.Əmirov adına NQÇİ tərəfindən istismar olunur.